A distancia sprint resísteselle a Gómez Noya, cuarto en Gold Coast
Por Diego Espiño
Non puido repetir vitoria Javi Gómez Noya na segunda carreira das Series Mundiais celebrada este sábado na localidade australiana de Gold Coast, pero polo menos puido reter o liderado da clasificación xeral.
O triatleta galego foi cuarto nunha carreira disputada baixo distancia sprint (750 metros de natación, 20 quilómetros de ciclismo e 5 quilómetros de carreira a pé), que non se adapta tan ben como outras ás súas características.
A pesar diso tentouno todo. Tras saír da auga nas primeiras posicións marchou na cabeza nun grupo de cinco no que tamén destacaba o surafricano Henri Schoeman. Por detrás, a só 9 segundos, estaban o resto de grandes favoritos, que non permitiron que a fuga callase e neutralizárona a falta de 11 quilómetros para a transición.
Só o australiano Fisher rompeu o grupo nos quilómetros finais da bicicleta para alcanzar ata 16 segundos de renda na última transición, pero non era rival. Apenas un quilómetro de carreira a pé serviu para definir as posibilidades de cada un e na cabeza quedaron só cinco triatletas, entre eles tres españois como Mario Mola, Fernando Alarza e o propio Gómez Noya xunto a Richard Murray e Birtwhistle.
Este último foi o primeiro en quedar descolgado para despois, a falta de 1,5 quilómetros, reducirse as opcións de vitoria a un duelo entre Richard Murray e Mario Mola, que incrementara o ritmo. Por detrás a pelexa polo bronce era para Alarza e Gómez Noya.
Ao final Mola superou con claridade ao sprint a Murray para facerse co triunfo tras 52 minutos e 35 segundos de esforzo. Segundo foi Murray e terceiro, a 10 segundos, un Fernando Alarza ao que non puido seguir o galego (52:51).
Son con todo importantes puntos para Gómez Noya, que se mantén como líder das Series Mundiais con 1.433 puntos, seguido de Murray (1.326), Alarza (1.318) e Mario Mola (1.264).
A próxima cita das Series Mundiais, xa en distancia olímpica, disputarase o día 13 de maio en Yokohama, Xapón.
Relacionadas:
-
Gómez Noya retoma o pulso ás Series Mundiais en Hamburgo
Por Redacción |
-
O Concello de Pontevedra, patrocinador de Javi Gómez Noya durante os dous próximos anos
Por Diego Espiño |
-
Día duro para Javi Gómez Noya en Yokohama
Por Diego Espiño |
-
Javi Gómez Noya regresa ás Series Mundiais en Yokohama
Por Redacción |
-
Australia, segunda parada nas Series Mundiais de tríatlon para Javi Gómez Noya
Por Redacción |
-
Regreso soñado de Gómez Noya ás Series Mundiais, con vitoria en Abu Dhabi
Por Diego Espiño |