28 quilómetros a nado entre Sálvora e Vilagarcía completarán a Triple Corona Illas Atlánticas
Por Redacción
Tras pasar estes dous últimos anos polas rías de Vigo e Pontevedra, a Triple Corona Illas Atlánticas de travesía a nado prepárase para o que será o seu peche, cunha ruta competitiva entre a Illa de Sálvora e Vilagarcía.
A proba fixouse para o día 2 de setembro, data na que preto dun cento de deportistas completarán os 28 quilómetros de percorrido pasando polo Grove, Cambados, A Illa e Vilanova ata chegar á praia de Compostela, superando, ademais da propia distancia, a baixa temperatura da auga, as correntes ou a ondada.
A primeira das carreiras desta triloxía uniu a Illa de Ons con Sanxenxo (13 quilómetros) e a segunda a praia de Rodas, nas Illas Cíes, coa praia de Ribeira, en Baiona (16 quilómetros).
Agora, na etapa máis longa e esixente da Triple Corona, a organización habilitou un límite de 100 prazas e un amplo despregamento organizativo.
O prazo de inscrición abriuse este mércores 1 de febreiro e permanecerá activo ata o día 15 de xullo, a través da páxina web www.triplecoronaillasatlanticas.com.