Iago Tudela e Raúl Ibargüen, do Pontevedra Rugby Club, convocados pola Selección Española sub-16
Por Redacción
O equipo técnico da Federación Española de Rugby incluíu a Iago Tudela e Raul Ibargüen "Lombo", xogadores do Pontevedra Rugby Club, na convocatoria da Selección Española sub-16 que se celebrará do 1 ao 3 de marzo en Madrid.
Os técnicos do Pontevedra Rugby Club definen a Raúl Ibargüen, na súa posición de pilier, como un xogador "poderoso e dominador no contacto e nas fases tácticas do xogo, ao que suma enormes calidades técnicas e visión de xogo". Pola súa banda ven a Iago Tudela, medio melé, con "unhas calidades atléticas envexables para pensar e repartir xogo, con velocidade e intelixencia".
A citación destes xogadores, únicos galegos da lista, súmase á dos seus dous compañeiros de club Alberto Silla e Ernesto Lumbreras, que acudiron á última xornada de adestramento do combinado sub-18 e manteñen a esperanza de poder entrar na convocatoria final para o Europeo da categoría, a disputar na localidade francesa de Grenoble entre o 22 e o 30 de marzo.