Dobrete pontevedrés en C-2 para pechar un exitoso Campionato de Europa de Piragüismo Maratón
Por Diego Espiño & Diego Torrado
Inmellorable peche de competición no Campionato de Europa de Piragüismo Maratón coa proba máis esperada pola afección local, o C-2 senior masculino.
As expectativas eran altas e os protagonistas non defraudaron, con dobrete pontevedrés na primeira e segunda posición final. Tono Campos (Breogán do Grove), que xa se impuxera no C-1, conseguiu o seu segundo ouro do campionato, esta vez co seu compañeiro José Manuel Sánchez tras ser os máis rápidos nos 26,2 quilómetros de percorrido polo río Lérez.
A medalla de prata foi pola súa banda para o pontevedrés Óscar Graña e o arousano Ramón Ferro (Kayak Tudense), despois dunha dura pugna que se empezou a decidir no último porteo.
"Nas últimas voltas iamos controlando entre nós e controlando tamén a distancia respecto dos húngaros para xogárnolo ao final. Sabiamos que gañar uns metros nos porteos ía ser moi valioso para a última volta e así foi", sinalou Campos tras a proba.
O flamante dobre campión mostrouse moi satisfeito por superar á parella húngara, actuais campións do Mundo e que foron terceiros finalmente, recoñecendo que "cando saímos e vimos que non viñan decidimos colaborar os dous barcos españois e xogárnolo ao final" xa que "era a estratexia que había que seguir para poder batelos".
Tono Campos e Josñe Manuel Sánchez completaron o percorrido en 2 horas e 50 segundos, con 32 segundos de diferenza sobre Graña e Ferro e 1:12 sobre os húngaros Kövér e Dóczé.
Tamén satisfeitos da súa actuación mostráronse Óscar Graña e Ramón Ferro co seu metal internacional número 18: "Eu teño case 40 anos e para nós é un éxito seguir sumando, sexa o metal que sexa. Evidentemente é en casa, queres gañar, pero é un subcampionato de Europa, que non é pouco", explicou o veterano pontevedrés.
Foron igual de ben as cousas no K-2 masculino, con ouro e prata para a delegación española. Os vencedores foron Iván Alonso e Diego Piña, padexeiros do Kayak Tudense, seguidos dos asturianos Luís Amado Pérez e Miguel Llorens.
Completou a xornada o K-2 feminino, na que a mellor tripulación española foi a composta por Estefanía Fernández e Nuria Villace, quintas.
Tras toda esta emoción chegou a quenda da cerimonia de clausura do Europeo, no que a organización pontevedresa espera ter dado unha grande imaxe pensando na candidatura presentada para acoller en 2020 o Campionato do Mundo da especialidade.
Relacionadas:
-
A Copa de España de Medio Maratón no Lérez completa a intensa oferta deportiva da fin de semana
Por Redacción |
-
Óscar Graña e Ramón Ferro reflexionan sobre o seu futuro: "Ya son muchos años en la élite"
Por Redacción |
-
O pontevedrés Óscar Graña e o arousán Ramón Ferro colgan a prata no Mundial de piragüismo maratón
Por Redacción |
-
Tono Campos repite en Brandemburgo subcampionato do Mundo de piragüismo maratón
Por Redacción |
-
Os piragüistas pontevedreses, á conquista do Mundial de Maratón en Brandeburgo
Por Redacción |
-
Lores, sobre o Mundial de Piragüismo Maratón: "Se non é no 2020 será no 21"
Por Diego Espiño |
-
Ouro continental para Tono Campos e bronce para Raquel Rodríguez nunha espléndida xornada de piragüismo
Por Diego Espiño & Diego Torrado |
-
Xornada sen medallas para os padexeiros locais no Europeo de maratón
Por Redacción |
-
Lara Outón estrea o medalleiro pontevedrés no Europeo de piragüismo maratón
Por Diego Espiño & Mónica Patxot |
-
Quenda para os elite no Europeo de Maratón
Por Diego Espiño & Mónica Patxot |
-
Os deportistas Master enchen de cor o río Lérez na estrea do Europeo de Piragüismo Maratón
Por Mónica Patxot |