A tripla coroa de Sonia Pariente
Por Redacción
É pouco habitual ser competitivo en modalidades tan diversas do tríatlon como a distancia olímpica e a longa distancia, pero Sonia Pariente empeñouse en demostrar que é posible.
A triatleta pontevedresa do GV Sports proclamouse a pasada fin de semana campioa galega de longa distancia nas Pontes, completando un triplete que será díficil repetir, xa que nesta tempada se impuxo tamén nos campionatos autonómicos en distancia olímpica e en media distancia, este último celebrado en Sanxenxo.
Tres títulos galegos na mesma tempada para situarse ademais na cabeza do ránking do circuíto galego de longa distancia.
Sonia completou a xesta no Northwest Triman das Pontes, unha proba en distancia Ironman (3,9 quilómetros de natación ,180 de ciclismo e 42 de carreira a pé) na que finalizou na terceira posición absoluta, cun tempo de 10 horas, 53 minutos e 31 segundos. A gañadora foi a andaluza Patricia Bueno (10:19:39), con Ana López de San Román (10:46:40) na segunda praza.