O Open Cidade de Pontevedra quenta motores para o Europeo de piragüismo maratón
Por Redacción
O río Lérez acollerá este sábado 11 de xuño a primeira edición do Open Cidade de Pontevedra de Media Maratón, unha proba que se celebrará no mesmo trazado deseñado para o Europeo de piragüismo maratón, cuxo inicio está previsto para finais deste mes.
Neste Open Cidade de Pontevedra competirán as categorías senior e xuvenil e é unha proba valedoira para a Liga Galega. A pesar diso, haberá participantes de toda a península e poderán optar á medalla nas súas respectivas probas.
Entre os 426 deportistas que tomarán as distintas saídas hai que resaltar o altísimo nivel da competición, ao contar con grandes nomes do maratón nacional e internacional.
O duelo máis intenso poderá verse no C2 senior onde as parellas internacionais de Tono Campos xunto con José Sánchez mediranse con Óscar Graña e Ramón Ferro, un duelo onde saltarán chispas para conseguir a vitoria, coa esperanza de que se repita un mes máis tarde no campionato europeo.
Tamén será interesante o duelo que manterán en C1 senior Manuel Garrido, David Mosquera e os sub 23 do Piragüismo Verducido Damián González e Manuel Cons, salvo o tudense todos eles clasificados para o europeo nas súas respectivas categorías. Ademais poderase ver ao medallista mundial e europeo do Club Kaiak Tudense Iván Alonso, formando K2 con Diego Piña.
As distintas saídas da regata darán comezo ás 10:00 da mañá sendo a última ás 13:09. A entrega de medallas está prevista para as 14:15 horas.
Relacionadas:
-
O Lérez, escenario dun animado Open Cidade de Pontevedra de piragüismo
Por Redacción |
-
Breogán e Verducido logran grandes resultados no Campionato de España de Piragüismo Maratón
Por Redacción |
-
Pontevedra renova o seu compromiso co piragüismo
Por Alejandro Espiño |
-
Pontevedra empeza a vivir o Campionato de Europa de Piragüismo Maratón
Por Diego Espiño |