Sete anos despois volve o waterpolo internacional a Pontevedra
Pontevedra gozará de waterpolo de primeira liña coa disputa da V edición do Trofeo Internacional de Waterpolo Cidade de Pontevedra, que tras a edición de 2008, retoma a súa actividade ao grande da man do Club Waterpolo Galaico Pontevedra.
O equipo pontevedrés disputará durante este sábado 19 de marzo un trofeo que se xogará a modo de triangular, en categoría senior, coas instalacións do Centro Galego de Tecnificación Deportiva como escenario, e que os enfrontará a dous equipos de primeiro nivel na primeira división do waterpolo portugués, o SS Paredes Rota dos Môveis e o Clube Naval Povoense. Estes clubs contan con xogadores internacionais e no caso do Paredes, con participacións na liga europea.
Os partidos disputaranse en dúas quendas, unha de mañá e outra de tarde, onde o público poderá asistir de balde, organizándose desde as 11:30 horas ata as 14:00 horas e de 16:30 horas a 20:30 horas, nun formato de ida e volta entre os tres equipos participantes.
Ademais de traer o waterpolo internacional á cidade do Lérez, este torneo celébrase "con el objetivo de que el equipo absoluto masculino vaya preparando las semifinales y finales del play off por el título de liga", servindo como adestramento para o Campionato de España de Terceira División, como admitiu Javi de Sáa, adestrador do club, durante a presentación do trofeo este xoves 17 de marzo.
PARTICIPACIÓN NOS CAMPIONATOS DE ESPAÑA INFANTÍS
Doutra banda, os equipos da base do Club Waterpolo Galaico Pontevedra terán unha ampla representación nas seleccións galegas que participarán no Campionato de España Infantil Feminino FFTT e no Campionato de España Infantil Mixto FFTT en Valladolid, desde este xoves 17 de marzo ao domingo 20 de marzo.
Un total de oito selecciones autonómicas disputarán o infantil feminino mentres que 14 seleccións loitarán por ser o mellor equipo autonómico na categoría do infantil mixto, nuns campionatos nos que o Galaico achega cinco mozas e tres mozos á selección galega.