Duelo de xeiras positivas en Pasarón entre Pontevedra e Somozas
Por Diego Espiño
Pontevedra e Somozas miden este domingo no Estadio Municipal de Pasarón (17:00 horas) o seu bo momento de forma e resultados, que lles levou a ambos de comezar de maneira irregular a liga a situarse a un paso da zona de play-off de ascenso.
Tanto os granates, cunha derrota nos últimos nove partidos, como o cadro coruñés, cun partido perdido en oito xornadas, chegan lanzados a un derbi galego que pode consolidalos na zona nobre.
É a intención dun Pontevedra que quere facer bos, cun triunfo, os dous empates logrados de maneira consecutiva a domicilio.
Luisito espera atopar a un correúdo Somozas, que ademais recupera para a cita a dous homes craves tras cumprir un partido de sanción, como son David Añón e Antón de Vicente.
Pola súa banda o técnico granate, tras dar minutos aos menos habituais en Copa Federación, deberá decidir que xogador ocupa o posto no once do sancionado Adrián Mouriño, mentres Stili perde para o choque a Mateo Garcías, tamén por sanción.
Tras o último adestramento da semana, realizado na mañá deste sábado na Xunqueira, Luisito decidiu convocar a todos os seus xogadores, deixando os descartes para instantes antes de comezar o partido.
O encontro será arbitrado polo colexiado asturiano Pablo Fernández Pérez, auxiliado nas bandas por Juan Miguel Oses Arasa e Jonathan Romero García, e será televisado en directo pola segunda canle da Televisión de Galicia.
Relacionadas:
-
Preocupación polo estado dos lesionados
Por Diego Espiño |
-
O Pontevedra supera ao infortunio e ao Somozas (2-0) a base de fútbol e entrega
Por Ramiro Espiño & Diego Torrado |
-
Pontevedra e Marino de Luanco aburren nunha gris noite copeira (1-0)
Por Ramiro Espiño & Diego Torrado |
-
Oportunidade para os futbolistas menos habituais
Por Diego Espiño |
-
Grave erro arbitral e máis emoción que xogo no derbi entre Celta B e Pontevedra (1-1)
Por Ramiro Espiño & Diego Espiño |