Nova xesta de Javi Gómez Noya: tras varios días enfermo queda terceiro no Mundial de Ironman 70.3
Por Alejandro Espiño
Recuperouse da infección vírica que lle afectou esta última semana para poder competir, pero non o suficiente para poder mostrar todo o seu potencial. Aínda así, Javier Gómez Noya logrou colgarse a medalla de bronce no Campionato do Mundo de Ironman 70.3, tras finalizar en terceira posición na proba que se disputou este domingo na localidade austríaca de Zell Am See-Kaprun.
A carreira, como se prevía inicialmente, foi moi rápida. E Gómez Noya probou estar en boa forma ao saír en primeira posición da auga, tras os tres quilómetros de natación. Máis longos fixéronselle os 90 quilómetros sobre a bicicleta. O dominio do alemán Jan Frodeno, que posteriormente lograría a vitoria, comezou a fraguarse tras a primeira transición. Só foi mellor ca el -45 segundos- o seu compatriota Andreas Dreitz.
O triatleta afincado en Pontevedra chegou ao terceiro segmento, os 21 quilómetros de carreira a pé, cunha desvantaxe de case cinco minutos con respecto á cabeza. Pero pouco a pouco foi recortando esa distancia e, a falta de doce quilómetros para a meta, xa se situara na terceira praza provisional.
Frodeno, tamén especialista en carreira, para entón xa alcanzara a Dreitz e tan só tivo que administrar a súa vantaxe para chegar en solitario á liña de meta, concluíndo a proba cun tempo de 3 horas, 51 minutos e 19 segundos. Segundo foi o alemán Sebastian Kienle a 1:29 do gañador e o bronce para Gómez Noya que parou o crono en 3 horas, 55 minutos e 5 segundos.
O propio atleta comentaba as súas sensacións neste Mundial a través da súa conta de Twitter.
No ha sido mi mejor día. Sin energías desde el principio, luché y sufrí muchísimo para conseguir la 3 posición. Gracias por los ánimos!
— Javi Gomez Noya (@Jgomeznoya) agosto 30, 2015
Tras a súa participación neste Mundial de Ironman 70.3, Javi Gómez Noya volverá centrarse no seu grande obxectivo, asegurar o seu quinto triunfo nas Series Mundiais de tríatlon. Tras a súa vitoria en Estocolmo o pentacampionato está máis preto que nunca. Terá que confirmalo nas dúas últimas citas desta competición, que se disputarán nas cidades norteamericanas de Edmonton e Chicago.
Relacionadas:
-
Negociación aberta con Ironman para organizar na cidade un 70.3
Por Diego Espiño |
-
Gómez Noya, recibido con honras en Peinador
Por Diego Espiño & Mónica Patxot |
-
Pentacampión! Javi Gómez Noya engrandece a súa lenda co seu quinto título das Series Mundiais
Por Alejandro Espiño |
-
Chicago, última parada para Gómez Noya no camiño ao seu quinto título mundial
Por Redacción |
-
Gómez Noya remata segundo nas Series Mundiais de Edmonton e xa pensa na Gran Final
Por Diego Espiño |
-
Unha enfermidade pon en perigo a participación de Gómez Noya no Mundial 70.3, onde defende título
Por Redacción |
-
Javi Gómez Noya gaña en Estocolmo e queda a un paso do seu quinto Mundial
Por Redacción |