Falece José Luis Viesca adestrador do Pontevedra nos anos 70
Por Ramiro Espiño
Nacido en Mieres (Asturias), hai 77 anos, para os amantes e seguidores do fútbol local José Luis Viesca era un pontevedrés máis. Foi xogador do Pontevedra e adestrador tanto do primeiro equipo, a mediados dos anos 70, coma do Atlético Pontevedrés. No seu palmarés como técnico ocupou tamén os bancos doutros clubs próximos como Arosa, Cambados, Flavia de Padrón ou Lemos de Monforte, equipo no que marcou toda unha época.
Viesca adestrou igualmente o filial do Sporting de Gijón, ademais de exercer durante moitos anos de ollador do cadro asturiano por toda Galicia, captando novos talentos que remataban na escola de Mareo. Dos seus informes saíron cara á mítica canteira asturiana xogadores do talle do central Jiménez, que chegou a ser internacional, ou o porteiro Claudio, ambos os dous saídos das filas do Arosa.
Adestrador de estilo peculiar, deixou innumerables anécdotas dos seus anos nos bancos. Súa é unha frase da súa época en Mareo, que define perfectamente a súa filosofía futbolística: "azorrataos atrás e saíndo como fleches", lles dicía os seus xogadores, para facelos ver que non lle gustaban as alegrías ofensivas.
José Luis Viesca faleceu hoxe, xoves, e dende PontevedraViva queremos mandar aos seus familiares e amigos o testemuño da nosa condolencia, que se suma á de tantos e tantos xogadores que tivo ás súas ordes e que recordan a Viesca con cariño.
A condución do cadáver celebrarase mañá, sábado, día 15, dende o tanatorio de San Mauro ata a igrexa de Santiago Peregrino do Burgo, onde se celebrará o funeral, ás 12,00 horas, tras o cal será incinerado na intimidade familiar.