Derrotas de Mareantes e Pontevedra Rugby Club antes dun derbi que se converte nunha auténtica final
Por Redacción
O próximo sábado, día 17 de xaneiro, ás 16:15 horas o campo de Monte Porreiro acollerá un novo derbi pontevedrés entre Mareantes e Pontevedra Rugby Club convertido en partido vital para ambos os dous.
As derrotas a pasada fin de semana do PRC a domicilio ante o Muralla de Lugo (29-12) e do Mareantes na casa ante o Club Rugby Ferrol (27-35) apertaron ao máximo a clasificación da Primeira División Galega.
Por ese motivo as próximas xornadas antóllanse claves para definir os postos polos que cada equipo loitará a final de liga e, sobre todo, para non pasar uns apuros que non entraban nos plans de ambos os dous ao inicio de curso.
Tras a última xornada só cinco puntos, ou o que é o mesmo un só encontro (puntos por triunfo máis bonus), separan ao Muralla, terceiro clasificado, do último, o Universidade de Vigo B.
No medio sitúanse os dous equipos da cidade de Lérez. O Mareantes, grazas ao bonus logrado o pasado sábado, mantense cuarto con 14 puntos, os mesmos que Muralla, mentres o Pontevedra Rugby Club cae á sexta e penúltima posición con 10 puntos, só un de marxe co descenso.
Ingredientes que achegan máis picante a un duelo de rivalidade que nos últimos enfrontamentos se caracterizou por unha máxima igualdade.