O Arxil mostra a súa cara máis aguerrida para gañar na prórroga ao Celta (73-75)
Por Redacción
Sufrido e traballado triunfo do Arxil para pechar o ano tras impoñerse por 73-75 ao Celta Selmark no pavillón vigués de Navia.
As verdes pasaron por varios momentos complicados ao longo do encontro, no que tiveron que remontar en máis dunha ocasión, para acabar gañando na prórroga.
Saíron as locais máis acertadas, freando na pintura á arxilista Diarrá, e cun parcial de 10-2 que obrigou a Mayte Méndez a pedir tempo morto.
Tras ese parón as pontevedresas empezaron a funcionar e ao final do primeiro cuarto xa estaban por diante no electrónico (15-16). Non obstante as alternativas eran constantes.
Un bo parcial grazas ao acerto de Lewis e dous triplos de María Centeno permitiron ás pontevedresas irse ao descanso cunha pequena vantaxe (33-37).
Na reanudación foi quenda de novo para o Celta, que volteou a situación para mandar por sete puntos ao inicio do último cuarto (58-51).
O Arxil non se descompuxo e pouco a pouco foi recortando a desvantaxe para chegar, nun impreciso final, ao 66-66. As verdes tiveron posesión para gañar, pero non lograron encestar provocando a prórroga.
No tempo extra comezaron mellor as locais, pero apareceu a figura de Carla Fernández para anotar os seis últimos puntos do seu equipo e lograr a canastra definitiva tras un roubo de balón cando as viguesas afrontaban a última posesión con opción de triunfo.
Ao final vitoria arxilista que deixa ao equipo lerezano en terceira posición pero empatado coa segunda praza, despedindo o ano con sete triunfos e só unha derrota.
CELTA SELMARK (73): Marta Canella (12), Salomé García (6), María Pérez (20), Inés Faustino (4), Minata Keita (19) -cinco inicial- Cristina Loureiro (9), Laura Alonso (2), Ángela Coello (2), Paloma González.
CB ARXIL (75): Diarrá (13), Ana Martín (4), Carla Fernández (14), María Lago (5), Fallon Lewis (14) -cinco inicial- Ana Román (8), María Centeno (15), Cristina Díaz-Pache, Sandra Enteza (2).
Árbitros: Daniel Pazos e Adrián López. Sen eliminadas.
Parciais: 15-16, 18-21, 25-14, 8-15 -prórroga- 7-9.
Incidencias: Partido disputado no pavillón de Navia, Vigo.