Quinto posto final para Echegoyen e Betanzos no Intergaláctico de Brasil
Por Redacción
O 49er FX de Támara Echegoyen e Berta Betanzos non puido facerse finalmente co triunfo no Intergaláctico de vela disputado esta semana en augas de Río de Janeiro.
O tándem galego-cántabro cedeu o liderado na cuarta e última xornada de competición, caendo ata a quinta praza con 69 puntos, seis máis que o terceiro posto e 17 que as vencedoras, que foron as danesas Jena Mai Hansen e Katja Salskou-Iversen.
Con todo as sensacións foron moi positivas para a Echegoyen e Betanzos cun resultado que as consolidan entre as mellores regatistas da clase e despois de tres semanas de navegación nos campos de regatas que acollerán os próximos Xogos Olímpicos en 2016.
Pola súa banda Carlos e Antón Paz finalizaron en Brasil na décimo quinta praza no 49er, clase que estivo dominada polos neozelandeses Peter Burling e Blair Tuke.
A pesar de certa irregularidade, os vilagarciáns cárganse de moral despois de realizar grandes mangas e apuntarse mesmo un triunfo parcial.