Cómodo triunfo do Poio FS (5-1) sobre un Viaxes Amarelle que non inquieta
Por Ramiro Espiño
Cómoda vitoria no debut ligueiro para o Poio FS sobre un Viaxes Amarelle que apenas inquietou e que puido saír cunha goleada maior, de non ser pola sensacional actuación, ata a súa lesión mediado o primeiro período, da porteira Carmen, que se houbo de trasladar a un centro hospitalario ao sufrir unha escordadura nun dedo da man.
Primeira metade de clara superioridade do Poio FS que perdeu a ocasión de sentenciar o partido. As rapazas de Morenín adiantáronse pronto no marcador, tras un excelente roubo de Charo, que se anticipa ao rival para conducir a contra e disparar ao poste. O rexeitamento aprovéitao Jenni para marcar porta baleira.
Ían tan só cinco minutos de xogo e a partir de aí asistimos a un recital de ocasións freadas por un muro chamado Carmen. A exporteira do Poio salvou dous remates de gol a Souza e outros dous a Jenni, absolutamente providenciais para o seu equipo. Non obstante, no último deles, o disparo de Jenni custoulle a lesión do dedo maimiño da súa man dereita.
A xogadora retirouse entre a ovación da que ata pouco foi a súa afección (minuto 11 de partido), con bágoas nos ollos, mestura de rabia e dor.
Pero o que parecía achandar o partido ao conxunto local non foi así, xa que co rival en cinco faltas o Poio foi incapaz de volver xerar perigo serio, ata o descanso, nin provocar o dobre penalti, concedendo mesmo un par de contras perigosas que as coruñesas, moi inocentes, non souberon concretar.
Na reanudación viuse un Poio máis intenso que pronto ampliaba distancia nun remate raso de Nere. Non obstante un despiste defensivo, cunha perda de balón permitiu o rápido contragolpe das coruñesas, a súa única arma ofensiva ademais das accións a balón parado, ben culminado por Noe.
O 2-1 non inquietou ao conxunto local, que pouco despois executa a mellor xogada do partido, cunha gran triangulación culminada por Souza ao aproveitar un excelente pase de Nere.
As visitantes seguiron buscando as contras para intentar meterse novamente no partido, pero o equipo de Morenín apenas deixou espazos e cando o fixo apareceu Silvia para botar o cadeado á súa portaría.
Claudia sentenciaba a falta de tres minutos, aproveitando un rexeitamento, sen que a decisión á desesperada do técnico coruñés de recorrer ao xogo de cinco servise para nada máis que dar ao conxunto local a ocasión de ampliar a conta, o que logrou de novo Claudia, culminando unha gran xogada, cun tiro raso e cruzado.
POIO FS (5): Silvia; Jenni, Claudia, Nere, Elena -cinco inicial-, Irene (p.s.), Paloma, Yoly, Souza, Charo e Tania.
VIAXES AMARELLE (1): Carmen; Dolo, Lidia, Noe, Cris -cinco inicial-, Eva (p.s.), Espi, Tati, María e Yaiza.
Árbitros: Presedo García e Vilas Martínez (Santiago). Amoestaron a Claudia, Charo e Paloma, polo conxunto local, e a Espi, Cris, María e Yaiza, polas visitantes.
Goles: (1-0) Minuto 5: Jenni. (2-0) Minuto 21: Nere. (2-1) Minuto 25: Noe. (3-1) Minuto 28: Souza. (4-1) Minuto 37: Claudia. (5-1) Minuto 39: Claudia.
Incidencias: Pavillón Municipal da Seca (Poio). Uns 250 espectadores.