O Balneario de Cuntis, apoio para Diego Romero no seu camiño a Río 2016
Por Redacción
Diego Romero contará co apoio do Balneario de Cuntis no seu obxectivo de clasificarse para os próximos Xogos Olímpicos de Río 2016.
O canoísta do Breogán do Grove contará co patrocinio da instalación termal durante as próximas tres tempadas cun acordo que inclúe, ademais dunha achega económica, recursos materiais e a posibilidade de utiluzar as instalacións do balneario contando cunha fisioterapeuta acuática personalizada.
Esta circunstancia permitirá a Romero "adestrar e prepararme moito mellor, adquirir equipamento e aumentar o meu nivel", segundo recoñeceu o propio piragüista.
No recentemente celebrado Campionato de Europa de Augas Tranquilas Diego Romero e o seu compañeiro Tono Campos alcanzaron o quinto posto no C-2 1.000 metros, ademais de ser os actuais subcampions do mundo de Maratón.
O próximo reto para ambos os dous será o Mundial de piragüismo que terá lugar en Moscú entre os días 6 e 10 de agosto.