Os dianteiros Benja e Luismi aceptan a oferta de renovación do Pontevedra e continuarán no club
Por Redacción
Xunto coas novas fichaxes que se van presentando nos últimos días, os responsables do Pontevedra seguen reuníndose cos xogadores que, tras concluír contrato esta tempada, se lles ofreceu a renovación para continuar ligados á disciplina do equipo. E entre eles, outros dous aceptaron a oferta da entidade. Trátase de Benja e Luismi, que seguirán vestindo a elástica granate a próxima tempada.
En concreto, Benjamín Gómez 'Benja', dianteiro que chegou o pasado verán procedente do Celta B, continuará un ano máis no club. Aínda que non foi un dos xogadores máis utilizados a pasada tempada (marcou tres goles e xogou 21 partidos, pero só oito como titular), os responsables deportivos decidiron seguir contando con el a próxima tempada.
O mesmo caso é o de Luis Miguel Rincón Fontán, 'Luismi', que tras chegar do Ourense asinou este ano a súa primeira tempada no Pontevedra, na que marcou dous goles e xogou 21 partidos, once deles como titular. O seu contrato foi renovado por dous anos.
Con estas dúas renovacións, dos 14 futbolistas aos que o Pontevedra lles ofreceu continuar no club, oito aceptaron xa. Ademais dos dianteiros Benja e Luismi, son o porteiro Edu, os defensas Adrián Gómez, Pablo González e David Feito e os centrocampistas Kevin Presa e Tubo. Aínda non asinaron Yago Vázquez, Fran Fandiño, Tomás e Pablo Carnero.
Os únicos que rexeitaron a oferta do club foron Pedro Crespo e David García.
Relacionadas:
-
Jorge Rodríguez e Capi, ex xogadores de Rácing de Ferrol e Ourense, súmanse ao Pontevedra 2014-2015
Por Ramiro Espiño |
-
Fran Fandiño seguirá dous anos máis no Pontevedra e Yago Vázquez anuncia que non renova
Por Alejandro Espiño |
-
Alberto Campillo e Adrián Mouriño fichan polo Pontevedra; Pablo González renova e David García é baixa
Por Alejandro Espiño |
-
Adrián Gómez e Kevin Presa continuarán no Pontevedra un e dous anos máis, respectivamente
Por Redacción |
-
Sergio Lloves, primeira fichaxe do Pontevedra 2014-2015; David Feito, renova o seu contrato co club
Por Redacción |