O futuro do taekwondo galego, reunido en Pontevedra para participar no III Open Cidade do Lérez
Por Redacción
O Pavillón Municipal dos Deportes acolleu esta fin de semana a III edición do Open Cidade do Lérez de taekwondo. Máis de 300 deportistas participaron nunha cita para taekwondistas en idade infantil, cadete e júnior que fixo as delicias dos afeccionados a esta disciplina. O campionato foi organizado, un ano máis, polo Club de Taekwondo Taekanart e contou co apoio do Concello de Pontevedra.
Na competición, que se celebrou por vez primeira durante dous días, participaron un total de 14 clubs, cuxos deportistas probaron sorte tanto en modalidade de combate coma nas diferentes exhibicións que formaban parte do programa.
Ademais do club anfitrión, acudiron a esta cita novos taekwondistas do Mace-Sport de Pontevedra, Natural Sport de Sada, CEIP Coiron Dena, Mat's de Marín, as Escolas Deportivas de Poio, Garrapucho da Coruña, Taekwondo Zamora, Luar de Vilalba, Suh Sport, Suh Boiro, Kido Sanxenxo, Olimpia Coruña e Jovens de Ouro (Portugal).
A pista do Pavillón Municipal dos Deportes converteuse nun enorme tatami onde se viron combates espectaculares a pesar da mocidade dos seus protagonistas. O evento pechouse coa obrigada entrega de medallas e trofeos aos primeiros clasificados das diferentes categorías e pesos que integraban a competición.
O Open Cidade do Lérez é unha competición, iniciada hai dous anos, que naceu coa intención de servir como peche de curso para as escolas de taekwondo e como complemento o Open Cidade de Pontevedra, organizado polo Mace-Sport, máis dirixido a deportistas de elite.