Competición confirma o ascenso do Poio Artai ao concluír que non amañou o playoff a Primeira Nacional
Por Redacción
Final feliz para o Poio Artai. Xogará a próxima tempada na Primeira Nacional do balonmán español. O Comité Nacional de Competición desestimou a reclamación formulada polo Base Oviedo, que alegaba que o club pontevedrés e o seu rival no último partido polo ascenso, o Aluminios Usurbil vasco, pactaran un empate para ascender os dous a custa dos asturianos.
Na resolución coñecida nas últimas horas, o comité conclúe que non ten lugar á incoación de expediente disciplinario ningún ao considerar que non existen indicios da posible comisión da infracción denunciada.
Tras este veredicto, o propio Comité Nacional de Competición levanta a suspensión provisional acordada no seu día e declara como definitivo o resultado da clasificación do Grupo B da fase de ascenso a Primeira Nacional Masculina.
Neste sentido e con respecto ao partido en si, aproba definitivamente o resultado que consta na acta do encontro celebrado o 16 de maio entre o Aluminios Usurbil e o Poio Artai, é dicir, o empate que deu o ascenso a ambos os dous conxuntos. Un ascenso que logran agora por segunda vez. Primeiro foi na cancha e agora nos despachos.
Contra esta resolución poderase interpoñer recurso ante o Comité Nacional de Apelación nun prazo máximo de 10 días hábiles. En todo caso, un hipotético recurso non paralizará nin suspenderá a execución do decidido polo comité de competición, salvo que, de forma expresa, se acorde o contrario polo órgano competente.
Relacionadas:
-
O TAD pecha definitivamente o caso de suposto amaño no ascenso do Poio Artai
Por Redacción |
-
Así comezará a Primeira Nacional: Bueu - Cisne, Lavadores - BM Pontevedra e Poio Artai - Calvo Xiria
Por Alejandro Espiño |
-
O ascenso do Poio Artai, en suspenso: a Federación abre expediente e analizará o partido
Por Redacción |