Luismi, operado con éxito para solucionar os problemas no seu xeonllo
Por Diego Espiño
O dianteiro do Pontevedra Club de Fútbol Luismi despediuse da tempada, a falta do decisivo partido de Puertollano, tras pasar polo quirófano para solucionar os problemas no seu xeonllo dereito que arrastraba dende un encontro en pretempada disputado en Portonovo.
Luismi foi intervido no Hospital Miguel Domínguez, no que lle realizaron unha artroscopia, despois dun curso no que non puido render ao seu nivel debido á lesión, provocada por un 'ratón articular'.
Agora o dianteiro, que estará mes e medio de baixa, pensa xa na próxima tempada, na que espera poder seguir defendendo as cores granates a pesar de finalizar a súa vinculación co club.
A súa intención é continuar para resarcirse dun mal ano e os contactos entre o equipo lerezano e o futbolista xa existiron para poder prolongar a súa vinculación, xa sexa para xogar en Segunda División B ou en Terceia, ocupando unha das fichas destinadas a xogadores sub-23.
AMIGABLE CONTRA O REAL VALLADOLID EN PASARÿN
A pesar de que no plano deportivo a atención do equipo non se desvía o máis mínimo do partido de fase de ascenso en Puertollano, no que o Pontevedra intentará remontar o resultado de 0-2 da ida, empézanse a coñecer detalles da próxima pretempada.
Un dos pratos fortes do período estival será a visita ao Estadio Municipal de Pasarón del Real Valladolid, recén descendido de Primeira a Segunda División.
Así o confirmou o club pucelano, que se concentrará no Balneario de Mondariz entre os días 20 e 27 de xullo e fixou un amigable ante o Pontevedra o día 26, sábado, na cidade de Lérez e outro ante o Cultural de Areas o domingo 27 en Ponteareas.