Así é o Portugalete, rival do Pontevedra na primeira eliminatoria polo ascenso
Por Diego Espiño
Sete participacións no play-off de ascenso nas últimas tempadas avalan ao Club Portugalete, primeiro rival do Pontevedra Club de Fútbol no seu camiño cara á Segunda División B.
O conxunto vasco, que finalizou segundo no seu grupo con 70 puntos lonxe do campión Leioa (81 puntos), gañou 20 partidos, empatado 10 e perdido 8 durante unha liga regular que chegou a liderar durante parte da competición.
O conxunto adestrado por Carlos Docando chegou a estar sen coñecer 16 xornadas a derrota (12 vitorias e 4 empates) entre a xornada 9 e a 24 que lle ergueron ao primeiro posto, o que dá fe da súa consistencia a pesar de que dende entón baixou o seu rendemento.
Nos últimos 14 choques ligueiros os números do equipo 'jarrillero', como os seus propio afeccionados lle denominan, falan de 5 triunfos, 4 empates e 5 derrotas, se ben nos encontros máis recentes foi quen de recuperar sensacións.
Sergio García, con 13 dos 67 goles do seu equipo en liga, é o seu máximo goleador, mentres o arqueiro Urko Macías disputou os 38 encontros con outros tantos goles encaixados, a razón dun de media por partido.
O conxunto vasco presenta uns números positivos fóra de casa, con nove triunfos, pero no seu estadio, La Florida, cedeu 4 derrotas e outros 4 empates durante a competición regular.
Espérase a presenza de varios centos de seguidores do Portugalete en Pasarón
O emparellamento ante o Pontevedra levantou unha grande expectación na afección do Portugalete, que estará presente en Pasarón con varios centos de seguidores, segundo o trasladado á directiva pontevedresa nos primeiros contactos mantidos entre ambas as dúas institucións.
En canto ás súas instalacións, o estadio de La Florida é un campo de herba natural, de 103x64 metros cun aforamento próximo aos 5.000 espectadores, para un club que segundo os seus datos oficiais conta con 1.155 socios na presente tempada.