Derrota do Marín Futsal no primeiro test de pretempada
Por Redacción
O Pavillón da Raña acolleu este sábado o primeiro test de pretempada dun Marín Futsal que aínda está a empezar a calibrar con More como novo adestrador e máis da metade do plantel novo.
Ademais do atractivo de ver en xogo ás recentemente chegadas, o conxunto marinense tivo en fronte ao aspirante para gañalo todo esta campaña, o todopoderoso Burela Pescados Rubén.
As da Mariña deron tregua ao comezo de partido anotando un escaso tanto e aproveitaron o cansazo das locais no segundo tempo para terminar goleando por cero goles a sete.
Ao finalizar o encontro, o adestrador do Marín analizou de forma positiva a primeira parte "onde o equipo apertou ben e xerou bo xogo fronte a un enorme rival" e lamentou que na segunda "pasou factura o aspecto físico e eses detalles tácticos que aínda temos que puír".