A Deputación de Pontevedra abre este martes, 6 de agosto, o prazo para que os deportistas da provincia que participan nos Xogos Olímpicos ou Paralímpicos de París 2024 poidan solicitar a nova liña de axudas, cun orzamento total de 125.000 euros.

Estas achegas, en réxime de concorrencia non competitiva, ascenden a 6.000 euros por deportista.

O presidente provincial, Luis López, destacou a importancia desta iniciativa: “Poñemos en marcha estas axudas porque máis da metade dos deportistas galegos que van a París 2024 son da provincia”.

Para acceder a estas axudas, os deportistas deben acreditar que competirán en representación de España nos Xogos Olímpicos ou Paralímpicos como deportistas, deportistas de apoio ou guías de deportistas paralímpicos.

Ademais, deberán ter nacido na provincia ou estar empadroados nela desde, como mínimo, o 1 de xaneiro de 2023; e non estar cumprindo ningunha sanción disciplinaria ou administrativa en materia deportiva de carácter grave ou moi grave.

As solicitudes poderán presentarse a través da Sede electrónica da Deputación ata o vindeiro 30 de setembro.

As bases da convocatoria, que inclúen todos os detalles e a documentación necesaria, están dispoñibles no Boletín Oficial da Provincia de Pontevedra (BOPPO).