A afección apoiará o Teucro diante do Parador no "partido" máis importante da súa historia
Por Ramiro Espiño
Case 70 anos de existencia están en perigo. O Teucro xogará o xoves posiblemente o "partido" máis importante da súa longa historia. Será no Parador de Turismo de Pontevedra onde os directivos do club azul se reúnan (17:30 horas) con representantes das institucións locais e autonómicas en busca dunha solución, ou de apoios que lle permitan despexar un complicado horizonte económico.
De entrada, a directiva que preside Carlos García Alén conseguiu un importante primeiro paso ao recibir confirmación da asistencia de representantes de todas as institucións, Concello de Pontevedra, Deputación Provincial e Secretaria Xeral para o Deporte da Xunta de Galicia.
Alí estarán: o concelleiro de Deportes de Pontevedra, Agustín Fernández; a deputada provincial, Begoña Estévez; o xerente da Fundación Deporte Galego, Javier Rico; e o coordinador en Pontevedra da Secretaría Xeral para o Deporte, Daniel Benavides.
Non asistirá por motivos de axenda o presidente da Deputación, Rafel Louzán, segundo explicou o presidente teucrista, e está por confirmar a presenza do alcalde, Miguel Anxo Fernández Lores.
Pero aínda que como é lóxico non asistirán á reunión a directiva contará cun respaldo de última hora, ao estar prevista a presenza da súa afección, que quere facerse notar ás portas do Parador, á chegada das autoridades, para deixar patente o seu apoio ao club e a calquera iniciativa encamiñada a encontrar a solución que evite a desaparición da entidade teucrista, tras o Granollers, o club máis antigo do balonmán español.
Para tal efecto un numeroso grupo de socios e afeccionados azuis solicitaron autorización nas últimas horas á Subdelegación do Goberno en Pontevedra para poder concentrarse na porta de entrada do Parador, realizando un chamamento ao resto de afeccionados para que acudan, se é posible vestindo a camiseta azul do club, ou calquera elemento tipo bufanda ou bandeira, que simbolice a súa identificación coa Entidade.
A convocatoria, realizada a traves de redes sociais e mensaxería, está a recibir unha sensacional resposta, ata tal punto que os responsables da idea non dubidan de que serán decenas os afeccionados que se congreguen.
Relacionadas:
-
Rafael Louzán: "Algún directivo do Teucro non está actuando de maneira leal con esta institución"
Por Diego Espiño |
-
O Teucro cualifica a ausencia de Lores e Louzán no Parador como "la primera piedra para hacer desaparecer al club"
Por Diego Espiño |
-
Optimismo teucrista tras a reunión coas administracións no Parador
Por Diego Espiño |
-
Xoves 6 de marzo, día clave para o futuro do Teucro
Por Diego Espiño |
-
O Teucro apela ao espírito do 'Pacto do Parador' para evitar a desaparición do club
Por Alejandro Espiño |