A armada do piragüismo pontevedrés segue gañando medallas alá por onde vai e, como non, deixou a súa pegada no Campionato de Europa de Sprint Junior e Sub23 que se celebra en Bratislava desde o xoves.

É este domingo cando se están disputando as finais deste europeo no que, desde ben cedo, fóronse subindo ao podio os padeeiros pontevedreses.

No caso de Manuel Fontán (Náutico Ou Muiño) e Martín Jácome (E.P. Ciudad de Pontevedra), proclamáronse campións de Europa Sub23 en C2 500m cun tempo 1:38.601. Segundos foron os polacos (+1.616) e terceiros os húngaros (+2.176).

A padeeira da E.P Ciudad de Pontevedra, Claudia Couto fíxose co subcampeonato sub23 en C1 500m despois de cruzar a meta a +1.060 da húngara Doura Horanyi (2:05.890). O podio completouno a checa Denisa Rahova (+1.293).

Lograron tamén a medalla de prata os sub23 Mauro Domínguez (Piragüismo Verducido) e Miguel Serrano no K2 500m (+0.296), que cederon no man a man cos eslovacos, que foron primeiros cun crono de 1:31.938. Terceiros foron os letones a +0.643.

Na xornada de tarde, o primeiro metal chegou da man de Antía Otero (E.P. Ciudad de Pontevedra) e María Moreno no C2 500 metros. A dupla logrou a medalla de prata medalla de prata tras quedar a +0.047 das húngaras, que foron primeiras ao parar o crono en 1:55.593. Terceiras chegaron as portuguesas a +0.970.

Tamén se proclamaron subcampioas de Europa as padeeiras que formaron o K4 500m júnior Yaiza Novo, Lucía Tenreiro, Natalia Moreira e Claudia Blanco. O cuarteto nacional fixo unha gran carreira e quedou a tan só 0.630 da embarcación húngara (1:35.473). O podio completárono as italianas, a +1.992.

Nicolás Braña (Piragüismo Poio) logrou a medalla de bronce en C1 200 metros (+0.584), só por detrás do ucraíno Vitalli Prystai (41.455) e do checo Ondrej Visner (+0.376), mentres que a dupla formada por Alba Rodríguez (Piragüismo Poio) e Elena Millán en C2 200m quedou sen ascender ao caixón por moi pouco (+0.524).

Neste caso, primeiras foron as húngaras cun crono de 45.152, segundas as portuguesas a +0.230 e terceiras as ucraínas a +0.482.