Boas sensacións de Támara Echegoyen en Miami: undécima na primeira proba da Copa do Mundo
Por Alejandro Espiño
A un paso da gran final quedaron Támara Echegoyen e Berta Betanzos na súa primeira proba da ISAF Sailing World Cup, celebrada esta fin de semana en Miami. As regatistas do equipo Movistar finalizaron en undécima posición na clasificación de 49er FX, clase na que pelexarán por chegar a Río 2016. Pero máis aló deste resultado, o tándem español ratificou as boas sensacións que demostraran nas últimas semanas.
Chegaron á última xornada de regatas na décima posición, posto que lles daba acceso á Medal Race, a loita polas medallas. Pero tras un cuarto, un vixésimo terceiro e un décimo posto nas tres últimas mangas disputadas, quedáronse a un paso. Pero está claro que a súa progresión foi máis que boa. Támara e Berta foron de menos a máis en Miami, chegando a acumular tres cuartos postos no seu marcador particular.
Tras tres semanas adestrando e competindo en Miami, Támara Echegoyen e Berta Betanzos regresan a España. Elas mesmas anunciábano en Twitter hai unhas horas
Going back home after 3 weeks of training in Miami.Thanks for supporting us #movistar #zhik #alpharopes#harken #rfev pic.twitter.com/3ucR6NlIBX
Echegoyen & Betanzos (@EBteam23) febrero 3, 2014
Agora, ambas deportistas descansarán uns días antes de emprender o seu novo reto deportivo para esta tempada. Aínda que o resto do Equipo Olímpico participará na oitava edición da Semana Olímpica Andaluza, que se celebrará en Cádiz entre o 27 de febreiro e o 3 de marzo, Támara Echegoyen e Berta Betanzos non estarán en dita proba pola escasa inscripción na súa clase.
Trasladarán polo tanto a súa base de adestramento a Palma de Mallorca, con vistas á súa participación na 44 edición do Trofeo Príncesa Sofía Mapfre. Terá lugar entre o 29 de marzo e o 3 de abril, aínda que antes verémolas en diversas regatas de adestramento.