"Hoxe é un día realmente fermoso, hoxe Pontevedra réndelle homenaxea a Fina Casalderrey", así o dixo este sábado o alcalde en funcións, Miguel Anxo Fernández Lores no acto de recoñecemento "a nosa escritora, a nosa veciña, a nosa mestra".

Fina Casalderrey recibiu a homenaxe Escritora na súa Terra-Letra E (de escritora), impulsada pola Asociación de Escritoras e Escritores en Lingua Galega (AELG) da que a autora é socia de honra.

Os actos comezaron ás 11.30 horas na Ponte das Palabras, no barrio pontevedrés de Monte Porreiro, co descubrimento dun monólito conmemorativo e a plantación da árbore elixida pola autora, un acivro.

Logo no Teatro Principal leuse a acta de concesión deste galardón nunha ceremonia na que interviron o alcalde; o presidente da AELG, Cesáreo Sánchez Iglesias, a autora da laudatio, Montse Pena Presas, ademáis da propia Fina Casalderrey e do coro Luis Álvarez Limeses.  

A xornada rematou cun xantar de confraternidade posterior no Liceo Casino de Pontevedra. 

Neste acto destacouse que Fina non só é unha escritora nomeada ao que se considera o Nóbel de Literatura Infantil e Xuvenil, o Premio Hans Christian Andersen tamén é "exemplo de constancia, de talento e de compromiso coas súas raíces, co rural; compromiso con Pontevedra, compromiso coa lingua galega, compromiso con este país e a súa cultura, compromiso coa súa xente", afirmou Lores.

"Hoxe non son de Pontevedra, hoxe son Pontevedra, levito", agradeceu Fina Casalderrey todo o agarimo brindado. "Eu non soñaba que algún día ía estar aquí en calidade de escritora rodeada de amigas, amigos, familia, recibindo este fermoso agasallo que ven arroupado polos afectos".

 

Pantalla completa