Novo concerto da Sociedade Filarmónica co cuarteto de corda Nel Cuore interpretando obras de Beethoven e Mendelssohn
Por Oskar Viéitez
O vindeiro luns, día 15, ás 20:30 horas, o Teatro Principal acollerá un novo concerto organizado pola Sociedade Filarmónica de Pontevedra.
Nesta ocasión estará protagonizado polo cuarteto de corda Nel Cuore, Cuarteto Residente da Real Academia de Belas Artes de San Carlos de Valencia.
Formado orixinariamente no Conservatorio Superior de Música de Valencia, o Nel Cuore foi o primeiro cuarteto español admitido na prestixiosa Accademia W. Stauffer dei Cremona (Italia), onde se perfeccionaron desde 2014 ata 2017 co Quartetto dei Cremona.
En 2017 foron admitidos no Departamento de Cuartetos de Corda no Instituto Internacional de Música de Cámara de Madrid (Escola Superior Raíña Sofía).
O Cuarteto Nel Cuore actuou en varias localidades de España e Italia, como Madrid, Milán, Cremona, Verona, Siena, etc. En 2015 foron seleccionados para participar no VI Festival Internacional de Música de Cámara Fundación Monteleón, e en 2018 foron seleccionados para tocar no ciclo de concertos da Fundación Più Mosso. Así mesmo, son os gañadores dos Circuítos FestClásica 2017, o que lles levou a tocar en diversos Festivais, como o Festival de Música española de Cádiz, o Festival Internacional de Panticosa ou o Outono Musical Soriano.
Son gañadores de varios concursos de música de cámara, como o VI Concurso Villa de Cox, o VI Concurso de Burriana e o IX Concurso de Mislata. Así mesmo, obtiveron o Segundo Premio no Concurso de Música de Cámara de Cofrentes e foron semifinalistas do Concorso Internazionale Salieri-Zinetti 2016. Destacan as súas actuacións na Fundación Juan March, a Real Academia de Belas Artes de San Carlos, o Festival ENSEMS ou o Auditorio Nacional de Música de Madrid.
No concerto do luns, o Nel Cuore ofrecerá o Cuarteto de corda nº 7 de Beethoven, e o Cuarteto de corda nº 6 de Mendelssohn.