![](/web/cache/scene/uploads/fotos/foto/7a8/_S7QytKoutjK3UsovKMnMzytWsi62MjawUqrKz891Lsov0DGzMN_/_AxNjDQSU7NK0kt0snNTEnJSVWyrgUA_/63ebe8abce-presentacion-monteagudo1.jpg)
© Deputación de Pontevedra
'Vémonos mañá', o libro sobre Josefina Arruti e Osorio-Tafall, presentado na Deputación
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/47d/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/63ebe86f8f-presentacion-monteagudo3.jpg)
© Deputación de Pontevedra
![](/web/cache/scene/uploads/fotos/foto/96d/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/63ebe8d23d-presentacion-monteagudo4.jpg)
© Deputación de Pontevedra
Bibiano F. Osorio-Tafall, presidente provincial, alcalde de Pontevedra durante a II República e exiliado, e da súa parella, Josefina Arruti, que sufriu a represión franquista con prisión e un arresto domiciliario, son os protagonista de 'Vémonos mañá', unha novela de Xosé Monteagudo, que este martes presentábase no Pazo Provincial da Deputación coa presenza de numeroso público.
O acto organizado pola Libraría Paz, a editorial Xerais, e o departamento de Memoria Histórica provincial contou coa intervención do autor; a deputada María Ortega; a técnica de memoria e xornalista Montse Fajardo; o editor de Xerais Fran Alonso; e o escritor Adolfo Caamaño.
Na súa exposición, a deputada responsable de Memoria Histórica sinalaba que o libro mostra a realidade das mulleres que padeceron as consecuencias dobres da represión, o exilio, os asasinatos ou as torturas aos homes, ademais da propia. Lembrou que no caso de Josefina Arruti permaneceu como prisioneira na actual Audiencia e tamén destacou as súas características como muller solidaria, que abriu o panteón familiar para dar acubillo ducias de persoas represaliadas.
Subliñou tamén a obriga das administracións públicas en reparar o dano de tantas décadas de silencio. María Ortega agradeceu publicamente que Carmiña, a filla de Xosefina Arruti e Bibiano F. Osorio-Tafall, cedera todo o arquivo fotográfico do seu pai á Deputación de Pontevedra e xa pode consultarse de maneira dixitalizada a través de AtoPO. "É unha xoia non só para coñecer mellor á parella senón tamén esa Pontevedra ilusionante que acolleu a Misión Biolóxica ou os faladoiros sobre o Estatuto", manifestou Ortega.
Xosé Monteagudo, autor deste traballo, destacaba a importancia de Josefina Arruti como símbolo da situación que viviron moitas mulleres durante o franquismo. "En silencio tiñan que seguir para adiante arrastrando moitas veces á familia", recoñeceu o escritor.
'Vémonos mañá' ofrece unha liña argumental marcada pola realidade que viviron Bibiano F. Osorio-Tafall e Xosefina Arruti, aínda que presenta parte dos feitos de maneira ficcionada ao non existir documentación sobre o que sentía a parella.