Libros e música acaparan case a metade das 157 propostas para participar en Culturgal 2013
Por Redacción
157 propostas chegaron á organización de Culturgal, a Feira das Industrias Culturais de Galicia, que se celebrará os días 29 e 30 de novembro e 1 de decembro no Recinto Feiral de Pontevedra. A partir de agora comeza un novo período na preparación desta edición. A organización de Culturgal 2013, coa colaboración da directiva da feira, emprenderá un proceso de selección para confeccionar o programa definitivo.
Entre os criterios de selección primaranse os proxectos a estrear na feira ou aqueles cuxo desenvolvemento estea en marcha, as iniciativas conxuntas entre empresas do mesmo ou diferente sector e as propostas que incidan na participación do público. Así mesmo considéranse con vantaxe as actividades que procedan de empresas asociadas ás entidades que forman parte da Asociación Culturgal ou daquelas que contraten un stand.
Das 157 propostas recibidas ata o pasado 3 de outubro tras un mes de prazo aberto, a maior cantidade proceden do sector do libro (37) e da música (33). As artes escénicas e o audiovisual suman case cincuenta propostas a partes iguais e destinados ao público infantil recibíronse dezanove proxectos. Ademais hai outra vintena de iniciativas que atinxen a máis dun sector e que están relacionadas coa comunicación, a arquitectura, a etnografía ou a didáctica.
A organización de Culturgal 2013 considérase satisfeita tanto pola cantidade (semellante á da edición pasada, na que se recibiran 156 propostas) como pola tipoloxía de iniciativas e proxectos recibidos.
Ao longo do mes de outubro realizarase a selección e o deseño do programa da feira que, este ano, reorganizará os espazos no recinto do Pazo da Cultura e introducirá algunhas actividades de pagamento apelando á corresponsabilidade, aínda que a entrada xeral seguirá sendo gratuíta. A organización lembra que o prazo de reserva de stands aínda está aberto ata o día 20 de outubro.
Relacionadas:
-
Concerto cos timbres e buguinas de 111 bicicletas
Por Redacción |
-
Chega o Culturgal 2013 coa vista posta en micropatrocinadores ante a redución do orzamento
Por Mónica Patxot & Anxo Lourido |
-
O Salón do Libro Infantil e Xuvenil candidato ao Premio do Público Culturgal
Por Redacción |
-
Aberto o prazo para participar no Culturgal 2013
Por Redacción |