Representación da obra "Jojo" en Domingos do Principal

Domingos do Principal recupera a historia de Jojo, o primeiro orangután rescatado da súa cautividade

Por Redacción & Cristina Saiz
Luns 8 de Marzo, 2021 ás 07:00 do Luns 8 de Marzo, 2021

O público pontevedrés achegouse este domingo a unha tenra historia, a de Jojo, o primeiro orangután que foi rescatado da súa catividade. Fixérono da man da compañía catalá Borja Ytuquepintas, os invitados a unha nova sesión de Domingos do Principal.

O seu espectáculo, titulado precisamente Jojo, narra precisamente a historia deste orangután, cuxo rescate significou o inicio do proxecto Animal Recue, unha ONG que traballa para que estes animais poidan ser rehabilitados no seu medio natural.

Usando poesía visual sen texto e empregando, entre outras técnicas, a area, a manipulación de monicreques e a música en directo, a compañía teatral ofreceu unha fermosa proposta escénica.

A próxima cita con Domingos do Principal será o próximo 14 marzo, en sesión dobre ás 12:00 e 18:30 horas, coa obra Semente - O homem que plantava árvores, da compañía portuguesa Ajidanha.