Nove películas competirán na sección oficial da quinta edición de Novos Cinemas
Por Alejandro Espiño
Pontevedra colocará de novo a alfombra vermella no Teatro Principal para acoller a quinta edición de Novos Cinemas, o Festival Internacional de Cine de Pontevedra, que se celebrará entre o 15 e o 20 de decembro. Nove películas competirán na súa sección oficial.
Todas elas, seguindo o espírito do festival, son todas primeiras ou segundas obras dos seus directores e directoras, que representan o cine contemporáneo máis creativo e arriscado.
Visións traxicómicas sobre a decadencia dun pensador británico do século XVIII, relecturas sobre a comedia adolescente de transición ao estado adulto, cine de xénero que axusta as contas cun pasado bélico e traumático ou reflexións profundas sobre a relación que establecemos coas imaxes que consumimos son varios dos temas centrais destas películas.
A sección oficial de Novos Cinemas estará composto por:
- Accidental Luxuriance of the Traslucent Watery Rebus (Croacia), de Dalibor Barić
- Air Conditioner (Angola), de Fradique
- Dramarama (Estados Unidos), de Jonathan Wysocki
- Fortaleza (Italia), de Ludovica Andò e Emiliano Aiello
- Il n'y Aura Plus de Nuit (Francia), de Eléonore Weber
- Mosquito (Portugal, Francia), de João Nuno Pinto
- Si yo fuera el invierno mismo (Arxentina), de Jazmín López
- Tal día hizo un año (Alemaña, España, Suiza), de Salka Tiziana
- The Trouble With Nature (Dinamarca, Francia), de Illum Jacobi
O xurado oficial, que outorgará o premio á mellor longametraxe, está formado pola programadora, escritora cinematográfica, docente e cineasta Elena Duque; o director e programador Pela del Álamo e a directora Nuria Giménez, que clausurará esta edición do festival coa súa primeira película, My Mexican Bretzel, e que terá un encontro co público.
O premio do xurado novo á mellor dirección será entregado por Fernando Areal Alvite, Alba Domínguez Serén, Miguel Gómez Abad, María Ramos Lamela e Ángeles Vidal Pallas, alumnado do campus de Pontevedra da Universidade de Vigo.
Pola súa banda, o premio da crítica ao mellor filme das seccións competitivas, a oficial e a paralela de Latexos, estará escollido polos críticos Ángel Suanzes, Toni Junyent e Mariona Borrull e o público decidirá co seu voto cal é o seu filme favorito desta sección.
CABECEIRA DO FESTIVAL
A autora da cabeceira da quinta edición do festival é Elena Duque, que expón que para crear esta peza empregou material da súa colección e tamén metraxe atopada no que un experto en ornitoloxía envolve a dous colibrís con coidado para poder transportalos a outro sitio.
"Esa imaxe conmoveume bastante porque sentín que apelaba á maneira na que o festival trata as películas: escólleas, envólveas con agarimo e lévallas ao público para que poida aprecialas en toda a súa delicadeza", explica a cineasta:
A banda sonora da cabeceira está tamén composta polo canto do ferreirolo, o paxaro que protagoniza a imaxe do festival, no que se aúna o son das ás da ave ao moverse co dunha guitarra final pertencente á canción Pajarillo verde, da artista venezolana Soledad Bravo.
Relacionadas:
-
As primeiras imaxes de "Welcome to ma maison", en exclusiva para Novos Cinemas
Por Redacción |
-
Novos Cinemas inicia a súa quinta edición coa 'Lúa vermella'
Por Mónica Patxot & Redacción |
-
A proxección de "Lúa Vermella" protagonista da xornada inaugural de Novos Cinemas
Por Redacción |
-
O Festival Novos Cinemas 05 preséntase cun formato adaptado que poderá seguirse a través da plataforma Filmin
Por Mónica Patxot & Anxo Lourido |
-
Estes son os cinco proxectos que forman parte do LAB de Novos Cinemas
Por Redacción |
-
Catro películas inéditas en Galicia competirán na sección Latexos de Novos Cinemas
Por Redacción |
-
Novos Cinemas daralle ao cineasta Luis López Carrasco o seu primeiro recoñecemento en solitario
Por Redacción |