Hidroxel e máscaras, control de temperatura e aforo restrinxido na reapertura do Museo de Pontevedra
Había ganas de museo. Así o comprobaron os responsables do Museo de Pontevedra que reabriu as súas portas este martes 2 de xuño e fíxoo superando as previsións de asistencia.
Ata quince persoas, só en horario de mañá, acudiron ao museo pontevedrés. Todas as visitas, de orixe en Pontevedra -menos dúas que confirmaron ser de Santiago de Compostela-, cumpriron estritamente os protocolos de desinfección, acceso e de temperatura.
Todos eles tiveron que desinfectar as mans con hidroxel para poder entrar no edificio e, tras o control de público e achegar os seus datos persoais, tiveron que atravesar un arco de metais e un control de temperatura.
Ademais, o Museo despregou vixilancia en todas as súas dependencias para garantir o mantemento das distancias de seguridade, certificando que os visitantes seguían os itinerarios marcados con indicacións no chan.
"Pensabamos que ao ser o primeiro día de volta á actividade e ao ser un día de semana a afluencia estaría máis parada. Virá máis xente, como habitualmente acontece, pola tarde, polo que estamos moi por enriba das previsións", subliñou o director da institución, José Manuel Rey.
O Museo de Pontevedra, que pechara o pasado 13 de marzo seguindo as recomendacións sanitarias, retomou a súa actividade coa súa colección permanente e con dúas exposicións temporais, unha dedicada a Leopoldo Nóvoa e a outra, a de Debuxantas, pioneiras da ilustración, que se prolongarán ata o 30 de agosto.
Iso si, non haberá roteiros guiados nin a posibilidade de organizar actividades grupais relacionadas coas exposicións. Pola contra, se pode acceder á sala de investigación, preferentemente con cita previa, co fin de garantir as distancias de seguridade.
Nos próximos meses, o aforo do Museo estará restrinxido ao 30% e as Ruínas de San Domingos, segundo avanza a dirección do organismo, abrirán no mes de xullo tras revisar o estado dunha fenda localizada o pasado ano.
Relacionadas:
-
A exposición "máis ambiciosa" sobre a Xeración Nós, no Museo na primavera de 2021
Por Alejandro Espiño |
-
Contratan seguridade e vixilancia para a Casa Azul, a unidade de drogodependencias e o gastromercado
Por Redacción |
-
O CITA reabrirá este martes con limitación de aforo
Por Alejandro Espiño |
-
O estudo xeotécnico é "favorable" para conectar baixo un grande soto os edificios centrais do Museo
Por Redacción |
-
O Museo de Pontevedra reabrirá o martes 2 de xuño cun 30% do seu aforo
Por Alejandro Espiño & Mónica Patxot |