Pancho Varona actuará no Teatro Principal de Pontevedra o 21 de febreiro
Por Alejandro Espiño
O Teatro Principal de Pontevedra acollerá o venres 21 de febreiro, ás 21.00 horas, o concerto dun dos artistas máis notables da música española: o compositor madrileño Pancho Varona.
A Pontevedra chega a xira Ruta52, coa que Varona está a percorrer as principais cidades españolas para repasar toda a súa carreira artística, 37 anos sobre os escenarios e escribindo temas para os principais artistas do noso país.
O últimos corenta anos da música española non se poden entender sen a figura de Pancho Varona. Seus son algúns dos temas que máis cantamos desde a década dos 80, sobre todo os de Joaquín Sabina, para quen compuxo un centenar de cancións.
Ademais, ao longo de toda a súa carreira, traballou con outros artistas como Joan Manuel Serrat, Luz Casal, Pasión Vega, Ana Belén, Miguel Ríos, Quique González, Christina Rosenvinge, Ana Torroja ou Hombres G.
Nesta xira Ruta52, Pancho Varona conta como foron compostas as cancións máis destacadas da súa carreira.
As entradas para este concerto, que teñen un prezo de 15 euros, están á venda a través da plataforma Ataquilla.com.