O Festival de Danzas do Mundo di adeus este domingo cunha exhibición en Montero Ríos
Por Diego Torrado & Redacción
Se aínda non puideches aprender pasos de baile básicos para saber moverte ao ritmo de sons afrolatinos, latinos ou africanos, este domingo o paseo de Montero Ríos seguirá acollendo clases gratuítas para todas aquelas persoas que queiran mover as súas cadeiras.
De 11.00 a 14.00 horas levarán a cabo as clases de danzas afrolatinas e latinas. A partir das 16.00 horas ofreceranse clases de danza africana e afrolatina para, a continuación, desenvolverse un espectáculo de exhibición na contorna da Alameda de Pontevedra. Será a partir das 20.00 horas coa intervención de artistas e escolas que participaron neste I Festival de Danzas do Mundo que se desenvolve na cidade desde o venres.
Habana 16, Jano & Marta, Luís & Tania, Estudo L. J., Escola baila comigo Vigo, Grupo Swing Girls, Aurea Febraio, O Tomasón e Escola Debora Alfaya participarán nesta mostra final.
E aquelas persoas que teñan forza para seguir bailando contan coa oportunidade de facelo a partir das 22.00 horas na Sala Jackson cun clase de Bachata con Raquel Rial.