O Principal acolle un concerto do Cuarteto AmarArt e a clarinetista Ona Cardona
Por Redacción
Organizado pola Sociedade Filarmónica de Pontevedra, o vindeiro luns 17, ás 20:30 horas, terá lugar no Teatro Principal un concerto que estará a cargo do Cuarteto AmarArt e a galardoada clarinetista Ona Cardona.
O Cuarteto AmarArt está considerado pola crítica especializada e o público como un dos mellores grupos de corda actuais.
Os seus integrantes son destacados solistas e profesores, con brillantes e dilatadas carreiras e que dedican parte significativa da súa actividade concertística ao ámbito camerístico. Mariana Todorova (violín), é concertino da Orquestra Sinfónica de RTVE desde 1997; natural de Varna ( Bulgaria), en 1995 gañou o prestixioso Premio Pablo Sarasate concedido pola Fundación Loewe e actuou en concerto co Stradivarius do compositor.
A menorquina Assumpta Pons (violín), Premio Extraordinario Superior de Música de Cámara no Conservatorio Superior do Liceu, é desde 1998 compoñente da Orquestra de RTVE e profesora titular de violín do Conservatorio Teresa Berganza de Madrid. Rocío Gómez (viola), ademais de concertista, é profesora de viola do Conservatorio Teresa Berganza de Madrid. Anxo García Jermann é violoncelo solista da Orquestra Sinfónica de RTVE e catedrático de violoncelo no Real Conservatorio Superior de Música de Madrid.
Para o concerto de Pontevedra, o Cuarteto AmarArt contará coa colaboración da clarinetista Ona Cardona, Primeiro Premio do Concurso Permanente de Mocidades Musicais de España e do Concurso Internacional Primeiro Palau.
Ona Cardona actuou en numerosos festivais internacionais e en salas como Palau da Música Catalá, Auditorio Nacional de Madrid, Wigmore Hall, St-Martin-in-the-Fields, Barbican Hall, Glyndebourne Opera, Berlin Konzerthaus, Nanjing Music Hall ou Carnegie Hall. Na súa discografía destaca o Cd para Columna Música que inclúe a primeira gravación da Suite para clarinete só de Michel Camilo. Gravou para RNE, TV2, D+3 Artmusic Project, Tritó ou Anacrusi.
O Cuarteto AmarArt e Ona Cardona ofrecerán no concerto do luns dous dos quintetos máis emblemáticas da historia da música para clarinete e corda, os de Mozart e Brahms.
Relacionadas:
-
O Cuarteto Novecento, especializado en música do impresionismo, actuará o luns 11 no Principal
Por Olaya Madrigal |
-
O Cuarteto Diógenes ofrecerá en Pontevedra obras de Mozart, Shostakovich e Beethoven
Por Redacción |
-
A violinista María Dueñas actuará en Pontevedra coa Orquestra Sinfónica de Galicia
Por Redacción |
-
Marta Infante e Jorge Robaina presentan o seu disco "Dvorák Songs" no Principal
Por Redacción |