O novo álbum de Morcheeba, 'Blaze Away', eixo do concerto da banda británica no Pazo da Cultura
Por Redacción
Morcheeba, un dos grupos máis relevantes do son trip-hop inglés, ofrecerá un recital o venres 23 de novembro no Pazo da Cultura de Pontevedra e as entradas xa se atopan á venda.
Nesta cita musical, a banda británica ofrecerá temas dos traballos editados desde os anos noventa pero, sobre todo, descubrirá o son en directo dos temas da súa última produción 'Blaze Away', un álbum que saía á venda o 1 de xuño deste mesmo ano.
Morcheeba marcou tendencias coas súas melodías nas que se recolle desde o optimismo máis esperanzador ata trazos de melancolía. A voz característica de Skye mestúrase co trip-hop, ritmos africanos e riffs de guitarras que se converteron en referentes durante os últimos lustros.
Este grupo nacía en 1995 e suma xa oito traballos discográficos. Na actualidade, o grupo está integrado por Skye Edwards e Ross Godfrey. Na súa última achega ao mercado deixaron xa un éxito como 'It's Summertime', que será un dos que ofrezan no seu concerto en Pontevedra.
As entradas pódense adquirir a través de Ataquilla e Ticketea con prezos, en venda anticipada, a partir dos 16 euros.
Esta actuación é a última programada este ano dentro do Ciclo Voices, que permitiu que Pontevedra puidese gozar de magníficos concertos internacionais como o de Jorge Drexler e o ofrecido por Jane Birkin coa Orquestra Filharmónica de Pontevedra.
Relacionadas:
-
Jane Birkin, a excelencia eterna, ovacionada no Pazo da Cultura
Por Diego Torrado & Anxo Lourido |
-
Morcheeba pechará o ciclo Voices en Pontevedra o 23 de novembro
Por Alejandro Espiño |
-
Os "salvavidas de hielo" de Jorge Drexler "flotan" con elegancia por Pontevedra
Por Alejandro Espiño & Diego Torrado |
-
Jorge Drexler comparte café e vermú co público de Pontevedra antes do seu concerto
Por Redacción & Beatriz Ciscar |