Os "caprichos" de dous xenios como Goya e Dalí exporanse no Café Moderno
Por Redacción
O Café Moderno de Pontevedra acollerá, a partir do 27 de setembro, a mostra Goya e Dalí. Os caprichos de dous xenios. Poderá visitarse ata o 19 de xaneiro.
Neste proxecto expositivo, deseñado expresamente para a ocasión, Goya e Dalí establecen un diálogo a través da serie Los caprichos, abordada por Goya entre 1796 e 1799 e revisada por Dalí dous séculos máis tarde apoiándose na técnica do heliogravado para realizar réplicas exactas dos gravados goiescos e intervir sobre elas.
Os vicios e os desacertos humanos son os temas que protagonizan estas obras. A vaidade, o sexo, a mentira e a ignorancia aparecen nesta serie de gravados que fascinou a Dalí ata o punto de convertela en materia prima da súa obra.
Un total de 80 obras asinadas por Dalí, xunto con gravados de Goya, conforman a mostra comisariada por Julio Niebla, encargado de realizar exposicións internacionais sobre Dalí e gran estudoso da obra de Goya.
A exposición está organizada por Afundación e o Museo do Gravado de Ribeira.