José Solla, o "grande embaixador" da provincia por todo o mundo
Por Oskar Viéitez
A presidenta da Deputación, Carmela Silva, visitou este mércores a exposición de José Solla no Sexto Edificio do Museo da man do propio pintor pontevedrés.
A mostra "Coplas de Cego", que recompila máis de 100 obras deste artista, xa recibiu dende finais de xullo máis de 6.000 visitas desde que fora inaugurada o pasado 26 de xullo e aínda estará aberta ata o próximo 23 de setembro.
Carmela Silva destacou a excelencia artística e persoal de José Solla, "un xenio que ten feito exposicións por todo o mundo, converténdose nun dos nosos grandes artistas, e polo tanto, nun grande embaixador de Galicia".
A presidenta provincial sinalou que Solla é "un home dunha creatividade desbordante, un artista total, unha persoa que ten unha capacidade de transmitir, a través da súa obra, todas as emocións que pode vivir un ser humano" e engadiu que "é unha persoa encantadora, marabillosa e cultísima, desas persoas ás que é un privilexio telo atopado na vida".
José Solla manifestou a súa satisfacción polo apoio que tivo por parte de todos. "Encantado y agradecido estoy y ya no puedo pedir más", sinalou.