A entrega do premio Nélida Piñón, inicio das xornadas Cuspedriños10
Por Redacción
O acto de entrega do Premio de Relato Breve Nélida Piñón será o punto de inicio da terceira edición das xornadas turísticas, históricas e culturais Cuspedriños10, que desenvolve o Concello de Cerdedo-Cotobade coa colaboración da Axencia de Turismo de Galicia.
Terá lugar o martes 11 de setembro, ás 19.45 horas, no salón de actos do consistorio de Carballedo e contará coa presenza da prestixiosa escritora brasileira, distinguida co Premio Príncipe de Asturias das Letras en 2005.
No evento entregarase o premio a Daniel Asorey e os respectivos accésits a Rosendo Cid e Xesús Fraga.
O resto da programación das xornadas Cuspedriños10 xa está moi perfilada e quedará completamente definida a vindeira semana para o seu desenvolvemento durante a segunda quincena do mes de setembro e o comezo do outono.
Así, xa se coñece que volverá a celebrarse o exitoso Roteiro do Foxo do Lobo de Arufe en colaboración coa Fundación Antonio Fraguas.
Esta camiñada é a única actividade que se mantén desde o inicio nestas xornadas polo seu indubidable tirón ao tratarse dunha das iconas do turismo natural no municipio.
Ademais, tendo en conta o potencial paisaxístico destas terras, o programa posiblemente inclúa unha segunda actividade de sendeirismo.
Tamén está previsto que se desenvolva unha charla, posiblemente para a mocidade, sobre o valor turístico e patrimonial dos Baños de San Xusto, que actualmente se atopan inmersos nun proxecto de rehabilitación, e outra sobre o Val de Quireza, xa pertencente ao territorio de Cerdedo.
Relacionadas:
-
Medio cento de persoas percorren o Roteiro do Foxo do Lobo de Arufe
Por Redacción |
-
O Premio de Relato Breve Nélida Piñón xa está nas mans do seu gañador, Daniel Asorey
Por Redacción |
-
Daniel Asorey, gañador da segunda edición do Premio de Relato Breve Nélida Piñón
Por Redacción |
-
Máis de medio cento de traballos optan ao II premio Nélida Piñón de relato breve
Por Redacción |