A fadista Ana Moura presentará en marzo o seu último disco no Pazo da Cultura
Por Redacción
A cantante portuguesa Ana Moura presentará en Pontevedra, dentro da súa xira mundial, o seu último disco, que leva por título 'Moura'. A fadista actuará o 11 de marzo no auditorio do Pazo da Cultura a partir das 20.00 horas.
Ana Moura é a artista portuguesa cunha carreira máis activa na actualidade. Vendeu máis de 300.000 discos e logrou dous Globos de Ouro, dous premios Amália e ademais colaborou con artistas como Caetano Veloso, Gilberto Gil, Prince ou os Rolling Stones.
A intérprete ofrece tanto fados como música tradicional tal e como se pode comprobart en 'Moura', o seu sexto álbum discográfico, que sucede a 'Desfado', o disco máis vendido en Portugal durante os últimos anos con cinco discos de platino.
As entradas terán un prezo de 18 e 20 euros na venda anticipada a través de Ticketea, mentres que na billeteira custarán 26 euros.