Samuel Lema preestrea a curtametraxe "Desde dentro" no Teatro Principal
Por Redacción
Un psicópata de identidade descoñecida está a cometer terribles asasinatos en Pontevedra. Ese é o punto de partida de Desde dentro, a nova curtametraxe escrita e dirixida polo director pontevedrés Samuel Lema. A súa preestrea será o mércores 26 de abril, a partir das oito da tarde, no Teatro Principal.
A curtametraxe, producida por Y la nave va y VTF, conta coa colaboración da Pontevedra Film Commission. Está protagonizada, entre outros, por Carlos Villa, Xoque Carbajal, Melania Cruz e José Lema.
Desde dentro conta a historia dos terribles asasinatos cometidos por un psicópata de identidade descoñecida na cidade de Pontevedra. O caso convértese nun boom mediático polo que unha productora, C5, decide realizar unha "instant movie" sobre o caso co obxectivo de aumentar a súa audiencia.
A película narra desde unha perspectiva múltiple os problemas que tivo a produción da película para saír adiante ademais de tratar de desentrañar a identidade do asasino, coñecido polos mass-media como "O Acechador".
Trátase dun híbrido interxenérico que aborda o subxénero do cine de psicópatas dende a perspectiva do found footage: do thriller e o terror psicolóxico ao metarrelato, pasando polo tamiz do surrealismo, a comedia negra e o mockumentary.