Os pontevedreses José Luis Rodríguez e David Quiñones, galardoados nos Premios Antonio Fraguas
Por Redacción
Os pontevedreses José Luis Rodríguez e David Quiñones, integrantes das agrupacións Os de Algures e Celme respectivamente, recibiron un galardón na XXII edición dos Premios Antonio Fraguas de investigación sobre o traxe tradicional galego. A entrega realizouse nun acto presidido polo alcalde de Santiago Martiño Noriega no Salón Nobre do Pazo de Raxoi en Santiago de Compostela.
José Luis Rodríguez é fundador da Asociación Gaiteiros Os de Algures, enxeñeiro agrónomo de carreira e profesor de secundaria de profesión, lograba o premio na categoría de traballos analíticos polo seu estudo sobre Carlos Sobrino e os traxes na Boa Vila. Neste estudo analiza a presenza da vestimenta tradicional na pintura de Sobrino, ofrecendo unha descrición detallada dos traxes e mostrando as reproducións actuais destas vestimentas.
David Quiñones, membro da Agrupación Folklórica Celme é veterinario clínico de profesión e obtivo o galardón na categoría de traballos descritivos por 'Remexendo nas arcas de leiro: historia e reprodución dun traxe tradicional'. Neste estudo presenta a recollida dun traxe antigo no concello ourensán de Leiro. A través do seu proxecto analiza as orixes, as pezas e presenta os patróns e a reprodución fidedigna actual.
Os premios de investigación Antonio Fraguas naceron en 1995. Na presente edición, o xurado estaba formado por Ana Branco Gómez, integrante da Fundación Rosalía de Castro; Xosé Manuel González Reboredo, do Padroado do Museo do Pobo Galego e Xesús Ferro Ruibal, do centro Ramón Piñeiro para a Investigación en Humanidades. Os premios contan cun gran prestixio dentro do mundo da indumentaria tradicional. Nesta ocasión, o xurado destacaba no acta a calidade dos traballos presentados, recomendando a súa posterior publicación.
Relacionadas:
-
David Quiñones, de novo Premio de Investigación sobre o Traxe Tradicional Galego
Por Anxo Lourido |
-
Casto Sampedro, protagonista da última "superprodución" de Os de Algures
Por Alejandro Espiño |
-
As cores dos traxes de Castelao brillan nun desfile-musical de Os de Algures
Por Diego Torrado |
-
"Superprodución galega" para homenaxear a Castelao este sábado no Principal con Os de Algures
Por Redacción |
-
Os cadros de Carlos Sobrino toman vida e recuperan a historia da Boa Vila
Por Redacción & Diego Torrado |
-
Máis de 60 persoas recrearán a memoria da cidade do Lérez nun inédito espectáculo etnográfico
Por Oskar Viéitez & Mónica Patxot |