O Garaxe Hermético, a escola de banda deseñada creada por Kiko da Silva en Pontevedra, obtivo un éxito absoluto nos Premios Xuventude Crea de Banda Deseñada 2016 convocados pola Xunta de Galicia.

Tres estudantes do curso profesional de "banda deseñada" deste centro lograban os tres primeiros premios do certame. Miriam Iglesias Pérez conseguía o primeiro premio, dotado con 3.000 euros, coa obra O reloxo biolóxico da cidade. O segundo premio, de 1.500 euros, foi a mans de Inés Vázquez pola súa obra Sangoma mentres que Daniel Corrada obtiña o terceiro premio, dotado con 1.000 euros, pola súa obra Flor de lume.

Miriam Iglesias é alumna de terceiro curso profesional en O Garaxe Hermético mentres que os outros dous premiados obtiveron o Premio Fin de Carreira tras finalizar a súa formación este ano no centro pontevedrés.

O Garaxe Hermético está a piques de cumprir 5 anos como Escola Profesional de Banda Deseñada de Galicia e conseguiu acelerar o proceso de aprendizaxe e profesionalizar aos novos autores gráficos da comunidade autónoma. Durante a súa traxectoria xa editou cinco libros realizados polos estudantes e publicados baixo o selo de Retranca Editora, ademais de montar seis exposicións colectivas e colaborar en diferentes medios de comunicación.

Con estes premios xa son 17 os autores premiados en distintos certames que pasaron por esta escola. Autores profesionais como Miguelanxo Prado, Fran Bo, Fernando Iglesias, Rodrigo Cota, Diana Varela, Carlos Portela ou Enma Ríos ofrecen clases ou colaboraron con sesións maxistrais neste centro.