12 persoas retomarán en febreiro as escavacións de Castro Alobre
Por Redacción
Un equipo de 12 persoas contratadas pola Deputación comezarán en febreiro as escavacións en Castro Alobre coa previsión de traballar en 400 metros cadrados máis de superficie durante catro meses. Ese equipo irase incrementando con máis persoal a medida que a empresa que se encarga das escavacións finalice a súa intervención en Santa Tecra.
Tras percorrer toda a zona de Montiño e prestar especial atención á zona exhumada en anteriores intervencións, os técnicos da Deputación acompañados pola concelleira de Urbanismo de Vilagarcía, Paola María, e do responsable de Obras, Lino Mouriño, visitaron o castro durante a mañá deste mércores 16.
Tras os traballos que se acometerán por parte da Deputación iniciarase o proxecto de musealización que vai financiar o ministerio de Fomento. Consistirá en consolidar as estruturas, instalaranse pasarelas para mellorar a visualización do xacemento e na colación de paneis informativos.
Este xoves 17 iniciaranse as obras de mellora do acceso a Castro Alobre, que co de Vigo son os únicos castros urbanos que se conservan en Galicia. O corredor actual pecharase e abrirase un paso provisional para os veciños na rúa Vista Alegre.