Dúas visitas guiadas semanais achegarán a obra de Sergio Portela a todo tipo de públicos
Por Redacción
O Museo de Pontevedra vén de inaugurar a exposición 'Senso Sublime' do artista Sergio Portela, que reúne máis de 70 obras entre escultura, pintura e fotografía.
Na inauguración estiveron presentes, ademais do propio artista, os comisarios da exposición, Antón Sobral e Patricia Trigo, o director do Museo, Carlos Valle, e o deputado provincial de Cultura, Xosé Leal.
Esta mostra, que xa fora presentada nun acto previo ante a prensa para dar a coñecer o proceso de montaxe, complementarase con actividades didácticas que permitirán achegar a obra do artista pontevedrés a todo tipo de públicos. O deputado provincial de Cultura, Xosé Leal, destacou na súa intervención "a dimensión social do museo que, a través destas visitas guiadas, permitirá crear espazos de interacción co público, fomentando o coñecemento e a reflexión sobre as diferentes manifestacións artísticas que se reúnen nesta exposición".
As visitas guiadas para público xeral serán gratuítas e realizaranse todos os xoves e sábados ás 19 horas ata o 8 de novembro, data na que se clausurará a exposición. Nesta ocasión, o museo provincial manterá a exposición aberta ao público durante mes e medio, máis tempo do habitual en relación a pasadas exposicións temporais.
Para participar nestas visitas guiadas non é preciso inscrición previa. As persoas interesadas tan só terán que achegarse o día da visita ao vestíbulo do Sexto Edificio do Museo á hora de inicio. Pola súa banda, os centros educativos poderán solicitar ao museo a realización de visitas para o seu alumnado, que se realizarán en horario escolar.
Ademais das visitas guiadas, a propia exposición en si atende expresamente ao aspecto didáctico sobre o proceso creativo deste artista.
Relacionadas:
-
Máis de 8.000 persoas visitan no Museo a exposición "Senso Sublime" de Sergio Portela
Por Redacción |
-
Membros da ONCE acoden a 'ver' a exposición 'Senso sublime'
Por Redacción |
-
Retómanse as visitas guiadas aos edificios do Museo
Por Redacción |
-
O 'Senso Sublime' do artista polifacético Sergio Portela explora o Sexto edificio do Museo
Por Anxo Lourido |