A Deputación ofrécelle aos concellos participar no seu posto no Culturgal
Por Redacción
O deputado provincial de Cultura, Xosé Leal, vén de remitir aos concellos da provincia de Pontevedra unha proposta convidándoos a participar e ter presenza activa na Feira das Industrias Culturais, Culturgal 2015. Na presente edición, a Deputación de Pontevedra contará cun posto institucional que quere poñer a disposición de todas as entidades locais, para brindarlles a oportunidade de que difundan a súa oferta cultural no marco deste evento.
Xosé Leal cualifica esta iniciativa como "necesaria para dar cabida a todas as propostas culturais posibles e contribuír deste xeito a enriquecer a oferta do certame". Considera, ademais, de vital importancia que os concellos teñan a oportunidade de "estar presentes nun encontro xa consolidado na difusión da cultura e cuxa influenza vai máis aló da provincia de Pontevedra".
O posto da Deputación é un espazo de nove por tres metros, que estará situado no corredor principal da feira e que dará cabida ao material que os concellos desexen difundir, co obxecto de dar a coñecer as súas propostas en calquera dos ámbitos da cultura como poden ser, por exemplo, certames, iniciativas musicais ou de artes escénicas.
Asemade, desde a Deputación tamén se está recabando o interese dos concellos en realizar presentacións de proxectos e actividades no marco da feira. As presentacións, que poden corresponder a iniciativas tanto de ámbito local como comarcal, ofrecen a posibilidade de darlle visibilidade entre os profesionais culturais, programadores, medios de comunicación e público en xeral.
A Feira das Industrias Culturais celebrarase no Recinto Feiral de Pontevedra do 4 ao 6 de decembro e na pasada edición, segundo datos da organización, contou cunha asistencia de público de arredor de 15.000 persoas.
Relacionadas:
-
A exposición 'Somos espazo' e unha unidade didáctica sobre Castelao, propostas da Deputación para Culturgal
Por Redacción |
-
Máis de 125 propostas creativas "presumirán" de Culturgal entre o 4 e o 6 de decembro
Por Cristina Saiz & Anxo Lourido |
-
O Culturgal 2015 xa está completo a dous meses da celebración da feira
Por Redacción |
-
A palabra será o principal motivo para "Presumir do Culturgal" na edición de 2015
Por Anxo Lourido |
-
Culturgal 2015 abre convocatorias para reserva de stands e presentación de propostas
Por Redacción |
-
Lores avanza a promotores culturais que impulsarán a Pontevedra como "centro do deseño e a creatividade"
Por Alejandro Espiño & Mónica Patxot |