Mil publicacións de agasallo para festexar o Día do Libro
Por Mónica Patxot
Numerosos amigos da lectura conmemoraron o Día Internacional do Libro achegándose ata o Servizo de Patrimonio Documental e Bibliográfico da Deputación de Pontevedra. Este 23 de abril entregábanse neste departamento de forma totalmente gratuíta mil exemplares.
Os interesados puideron escoller un libro de entre un total de setenta títulos diferentes que abordan aspectos moi variados do patrimonio cultural e da historia da provincia e dos seus concellos, obras poéticas, catálogos de arte, ensaios ou estudos de investigación que cobren os campos máis diversos.
Entre as publicacións que se ofreceron figuran títulos como Ao pé do prelo; Seoane, editor e artista gráfico; O Tombo do Hospital e Ermida de Santa María do Camiño de Pontevedra, de Ángela Comesaña; Pazos Gallegos. Materiales para su estudio, de Durán Loriga; O Cego de Padrenda de Manuel Durán Castro; Historia da Emigración Pontevedresa en Buenos Aires, obra colectiva y El Comercio Marítimo en Galicia, de Juan Juega Puig.