Dobre cita coa mellor música do Nadal, da man da Banda de Música de Salcedo
Por Redacción
Os seguidores da Banda de Música de Salcedo están de noraboa. Terán dobre oportunidade de velos en concerto esta fin de semana. Especialmente emotivo será o seu tradicional concerto de Nadal. Terá lugar o vindeiro domingo 23 de decembro, no Teatro Principal de Pontevedra, a partir das 20:00 horas.
Nel, a Banda de Música de Salcedo e a Coral Polifónica de Salcedo queren desexar aos pontevedreses un feliz Nadal e un próspero ano 2013. E que mellor que facelo escoitando un dos seus recitales que, como sempre, será de entrada gratuita ata completar aforo.
O concerto será dirixido polo Mestre José Alfredo Sánchez Murcia e levará a cabo un programa composto por obras como: Third Suite for Band, Granada, Sleigh Ride, el Murciélago e Adestes Fideles, entre outras.
Pero antes, este mesmo sábado 22 de decembro, o Auditorio da Cidade Infantil Príncipe Felipe, acollerá o recital do 1º trimestre da Escola de Música de Salcedo. Desde as 18:00 horas, os alumnos demostrarán os coñecementos musicais e a destreza adquirida cos seus instrumentos.
Parte destes alumnos son os integrantes do proxecto Música nas Parroquias co que a Asociación Músico Cultural San Martiño, a través da súa Escola, fomenta a música entre os máis pequenos co inicio na materia Música e Movemento.
Como colofón deste Recital, actuará a Banda Xuvenil de Salcedo, baixo a batuta de Alfredo Sánchez Seara.