Horacio Fumero, contrabaixista do mítico Tete Montoliu, principal atractivo do Jazz no Principal 2015
A X edición do festival municipal Jazz no Principal 2015 iniciarase o sábado 7 de marzo. O publico poderá gozar dos concertos principais que terán lugar os días 7, 14 e 21 ás 21.00 horas no Teatro Principal, ademais dos obradoiros que se celebrarán no antigo conservatorio de 11.00 a 14.00 horas durante os tres días.
Demetrio Gómez, concelleiro de Xuventude, e Luis Carballo, representante do Seminario Permanente de Jazz (SPJ), presentaron neste xoves 5 o cartel e os nomes dos intérpretes que tocarán este ano no festival. Un proxecto onde se reúnen artistas de alto nivel con outros novos músicos galegos.
O sábado 7 abrirase o festival con Ricardo Toscano, un novo solista de 21 anos que con tan só 16 foi a gran revelación do festival de Jazz de San Luís en Lisboa.
O día 14 será a quenda de Cennet Jönsson, que tocou coa Sinfónicade Galicia, e é o músico europeo mais veterano deste festival.
Para finalizar o festival, o 21 de marzo Horacio Fumero, un dos músicos de jazz mais activos da escena nacional que formou parte do mítico trío Tete Montoliu subirá ao escenario do Teatro Principal.
Ademais durante todos os días de concerto os artistas principais estarán acompañados por SPJ Group, agrupación formada por diferentes alumnos do Seminario Permanente de Jazz de Pontevedra.
Os concertos terán as entradas a un prezo de cinco euros, agás para os estudantes, parados e xubilados que as encontrarán a un prezo reducido de tres euros. Os obradoiros serán de libre acceso e aos asistentes daráselles un diploma acreditativo.
Fonte do video Horacio Fumero web