Quince ilusionistas enfeitizarán Marín a primeiros de outubro
Por Redacción
Do 3 ao 6 de outubro, a vila de Marín converterase no epicentro da maxia familiar coa celebración do Festival Internacional de Maxia Infantil, un evento único en España, adicado exclusivamente ao público máis novo, pero pensado tamén para o goce de toda a familia.
A sétima edición deste certame promete catro días cheos de ilusión, soños e fantasía, cunha intensa programación que traerá á vila a 15 artistas da maxia de diferentes puntos do mundo.
Esta mañá tivo lugar a presentación oficial do festival na Alameda de Marín, nun acto que contou coa presenza do Mago Paco, organizador do evento, a concelleira de Cultura, Marián Sanmartín, e representantes dos colaboradores, como Yonathan Carreira, xerente da Asociación de Comerciantes Estrela de Marín, e a maga viguesa Sara Rodríguez, de "Maxia na Manga".
O festival arrancará o xoves 3 de outubro coa maxia invadindo os colexios de Marín de 10:00 a 12:00 horas.
Pola tarde, ás 18:00 horas, a Biblioteca Municipal será o escenario de "Marvin, o mellor mago do mundo", a cargo de Francis Zafrilla, cunha entrada de 1 euro.
Esta primeira xornada centrará as actividades nos máis pequenos, pero ao longo dos días seguintes, a maxia chegará a todos os recunchos da vila.
O venres 4 de outubro, repetiranse as actuacións nos colexios pola mañá, e pola tarde arrancará unha das actividades máis esperadas: os Escaparates Máxicos, que levarán actuacións de vinte minutos a diferentes comercios locais.
Os pases realizaranse en varios puntos: Nube (18:00-18:20h), Librería Nobel (18:30-18:50h) e Ché-B-Re (19:00-19:20h).
Ás 20:00 horas, na Alameda, terá lugar o espectáculo "A caixa máxica" de Brando e Silvana, e ás 22:30 horas, o hall do Concello acollerá o espectáculo "Palabra de bruxa" da maga Matilda, cun custo de 1 euro e dirixido a maiores de 12 anos.
O sábado 5 de outubro comezará cun obradoiro de maxia na Biblioteca, ás 10:00 horas, para nenos e nenas a partir de seis anos, cun prezo de 1 euro e prazas limitadas.
A continuación, de 11:30 a 13:00 horas, realizarase a Ruta Maxia de Preto, con tres pases de 20 minutos en tres espazos distintos da vila: Joshua Kenneth na Praza de Abastos, Sara Rodríguez no hall do Concello, e Nacho Samena no Palco da Música.
A entrada a cada un destes espectáculos será tamén de 1 euro.
Xa pola tarde, o Parque Eguren será escenario do espectáculo "A maleta de Malastruc" do Mago Mag Malastruc, ás 17:00 horas, seguido por Carlos Tomico ás 18:00 horas coa súa actuación "Maxia con desgarbo".
O día rematará coa Gala Novos Talentos, con entradas a un euro, no Multiusos da Praza de Abastos, onde actuarán Mago Iago, Magaldara, Nacho Nogueira e Magic Mateo.
Pola noite, ás 21:00 horas, o público poderá gozar do espectáculo "Cirkalgia" de Dani Danielo na Alameda, e ás 23:00 horas, o peche da xornada correrá a cargo de Maxia na Manga no hall do Concello, con entrada de 1 euro e destinado a maiores de 12 anos.
Xa o domingo, 6 de outubro, as actividades comezarán ás 12:00 horas no Museo Municipal Manuel Torres, cunha sesión especial para os máis pequenos, de entre 1 e 4 anos, chamada "Pequemagia", a cargo de Francis Zafrilla, cun prezo de 1 euro.
Ás 13:00 horas, o espectáculo "A maleta de Malastruc" volverá á Alameda para continuar a xornada.
A traca final do festival chegará coa Gala do Festival Internacional de Maxia Infantil, que terá lugar no Multiusos da Praza de Abastos ás 18:00 horas.
Nesta gran gala, que terá un custo de 3 euros, participarán todos os magos e magas do certame: Francis Zafrilla, Dani Danielo, Matilda, Brando e Silvana, Joshua Kenneth e Mag Malastruc, pechando catro días de sorpresas.